मध्यपुर थिमि नपाया मेयरयात खुल्ला पौ

हनेबहःम्ह मेयर मदनसुन्दर जु ,
मध्यपुर थिमि नगरपालिका

करिब १९ दँ लिपा जूगु स्थानीय चुनावपाखे त्याःम्ह मध्यपुर थिमिया न्हूम्ह मेयर मदनसुन्दरजुयात छिगु कार्यकाल सफल जुइमा अले बिस्काः जात्राया यक्को यक्को भिन्तुना । छिगु कार्यकाल झीगु अधिकारया लागि, समानताया नितिं, थःगु पहिचानया नितिं छगू बांलाःगु अवसर जुइगु भलसा काये । झीगु पहिचान नेवाः, झीगु भाय् नेपालभाषा, झीगु थःगु सम्बत नेपाल सम्बत अले झीगु कला संस्कृति, तजिलजि मुक्कं झीगु थःगु जुयाः नं थौंतक थःत मालाजुया । जि निगूपुखू थिमी बूम्ह छिपा, थौं दुइ पोखरी च्वंम्ह रंजितकार जुइ धुन । जिं चायेक मचायेक हे जिगु पहिचान हिलेधुन । अथे हे थौं साय्मि मानन्धर, स्यस्यः श्रेष्ठ, गुर्जुपिं बज्राचार्य, कुम्हाः प्रजापति अले नाय खड्गी जुइ धुंकल । अथे हे नेवाःतय्गु बस्तिइ नेवाः भासं दूगु थायया नां थनया इतिहास व झीगु अस्तित्व नापं स्वानाच्वंगु झीगु त्वाःबहाःया नां खय्करण जुया वनाच्वंगु दु। बप्पा महाद्यः बिशेश्वोर महदेव अले अथे हे नगदेशयागु बिसनतकी न्हूम्ह महाद्यः स्थापना लिपा सिलेश्वोर अले बालयोगी जुइ धुंकल । अले झीगु थिमिया बिस्काःजात्रायात बिस्केट अले सिन्दुर जात्रा धका धायेगु यानाहःगु दु । नेवाःतय्गु लागाय् आदिवासी नेवाःतय्सं छूगु नांयातः खय्करण जूगु थ्व ला छगू दसि जक खः । राज्यया ज्याकुथिइ ला झीगु भाय् मदेकल मदेकल, थाय् नां तक नं मत्वःतल। व नं झीगु म्हसिकाया निंतिं छगू तःधंगु हाथ्या खः । उकिया निंतिं त्वाःत्वालयया गुथी, थीथी सामाजिक संस्था व क्लबत जानाः झीगु थःगु मौलिक नांयात पुनस्र्थापित यायेज्यू । थःथःगु त्वालय् च्वंगु सरकारी व गैरसरकारी ज्याकुथितयात नं निश्चित ई बियाः, इमिके हे नं ग्वहालि कयाः मौलिकता कायम यायेज्यू । झीगु थाय् नां झीगु हे भासं च्वयेनु व धायेनु ।

झीगु थःगु लजगा दुने थःगु अस्तित्व तनीगु अवस्था न्ह्यःने वयाच्वंगु दु । थौ सडक विस्तार, मनोहरा करिडोर अले स्याटलाइट सिटी धका झीगु ल्यंगु उब्जाउ भुमि , झीगु पुलांगु बस्ति झीगु लजगाः अले झीगु म्हसीका हे त्वपुइगु अले क्वथलेगु ज्या न्ह्याःगु दु । झीगु हे कला संस्कृति हलिमय् ब्वयाः थौं झीत आदिबासी मखु, झी जनजाति मखु धया हये धुंकल । घर नछुने पेटी नछाड्ने धैगु छिगु नगर विकासया स्लोगन झीगु नेवाः बस्ति सडक विस्तारया नामय् स्यनीमखु धैगु भलासा काये । झीगु कला संस्कृति, झीगु तजिलजि, झीगु नसाज्वलं, झीगु लजगाः, झीगु एतिहासिक सम्पदा फुक्कं सरकारी अलें देय्या हे चिं, राष्ट्रिय सम्पति सम्पदा, तर झीगु भाय, झीगु मौलिक सम्बत अले झी नेवाः मय र झीगु स्वनिगः दुने झीगु पहिचान ल्यंकेत, नेवाः जुयाः गर्व याना म्वायेत, झी पुर्खा तय्गु चिं ल्यंकेत, झी मस्तयत नेवाः र नेपालभाषा अले झीगु तजिलजि या ज्ञान बिइत र झीगु नां स्येंका खयकरण यायेगु ज्या याकन हे दीका झीगु मौलिक नां छ्यलेगु सुरु यायेमाःगु दु । भलसा काये, छिगु कार्यकाल दुने झीगु पहिचान र म्हासिकाया नितिं न्ह्यानाच्वंगु नेवाः पहिचानया पलाःयात यक्व टेवा दइ ।

इशापूर्व ३०० दँ न्ह्यःनिसें मध्यपुर थिमिया नगदेशय् न्ह्यानाच्वंगु व ७ दँ न्ह्यः बन्द जुयाः वंगु दँनिसें हाकनं न्ह्याःगु महाकाली प्याखं नगदेशय् थुगुसी हानं न्ह्याःगु दु । अथेहे, मध्यपुर थिमिइ ८ दँ न्ह्यःनिसें हे लोप जुयाः वंगु निदँ न्ह्यः स्थानीय युवाया पहलय् संचालन जूगु प्रसिद्ध व ऐतिहासिक भैलः प्याखं हानं न्ह्याःगु दु । प्याखं संचालनया नितिं स्थानीय बासिन्दा, चन्दा दाता व मध्यपुर थिमि नगरपालिकां ग्वाहालि याःगु दु थ्व बांलागु चिं ख । अथे हे थौंकन्हय् थःगु थाय् थःपिं मुना हे यच्चु पिच्चुके धैगु तातुना थौ ल्यायेम्ह पिं मुना चुक, पुखू, देगस् यच्चुकेगु ज्या न्ह्यानाच्वंगु दु, थ्व बांलाःगु सुरुवात खः । धार्मिक आस्था अले ऐतिहासिक महत्त्वं जाःगु देगः, बहाः, फल्चा, पुखू , झीगु संस्कृति, झीगु म्हासिका दुगु दरबार, द्यो छें परम्परागत स्वरुपं जिर्नोद्वारया पहल, झीगु मौलिक प्याखं, जात्रा, नखः चखः म्वाका तयेगु छिगु प्रतिबद्धता अले खलः, पुचः, गुथि, भजन मण्डलपिन्त आर्थिक ग्वहालियागु नगरपालिका, स्थानिय प्रतिनिधि पिनिगु सल्लाह अले ग्वाहालि च्वछाय बहः जू । थौंकन्हय्या ई धैगु झी नेवाःत कतः भाय् ल्हायेगुलि निख्खर जुइधुंकूगु ई खः । कर्किया संस्कृति नालाः कायेगुलि माहिर जुइधुंकूपिं खः । थः मचातसें कर्किया भाय् ल्हातकि गर्व तायेकीगु ई जुयाच्वंगु इलय् नेवाः संस्कृति–तजिलजि, नेवाः म्ये–संगीतलिसें भाषाय् नुगः क्वसायेकेत थाकुइ धुंकूगु ई खः । तर झी नेवाःत छधी छप्पं जुयाः हाकनं थःगु म्हसीका ब्वयेगु नितिं थुगु नेवाः संस्कृति–तजिलजि, संगीत, भाषा स्यनेगु व सयेके बिइगु ज्याया नितिं बृहत्त अभियान न्ह्याकाः पलाः छित धाःसा थ्व सम्भव दु, हाकनं झी, झी जुया म्वायेफइ । तर झी नेवाःत छधी छप्पं जुयाः हाकनं थःगु म्हसीका ब्वयेगु नितिं थुगु नेवाः संस्कृति–तजिलजि, संगीत, भाषा स्यनेगु व सयेके बिइगु ज्याया नितिं बृहत्त अभियान न्ह्याकाः पलाः छितः धाःसा थ्व सम्भव दु, हाकनं झी, झी जुया म्वायेफइ । झीगु नेवाः वस्ती दुने परम्परागत बहाः, बही, चीभाः, फल्चा, सतः, दिगु, क्वाःपाःछेँ, आगं, आखा आदि नं सुरक्षित याना तयेफइ । थःगु म्हसीका ल्यंकेगु ज्याय् सुथांलाक्क पलाः छीफइ । थुकि तःधंगु भूमिका धैगु हे नेवाः न्ह्यलुवाःतय्गु पहलकदमी कुतः, सरोकारवाला पक्षया योजनाबद्ध अभियानलिसें झी नेवाः व नेवाः अभिभावकपिनिगु नुगः क्वसायेकेगु व थः नेवाः जुयागुया गर्व यायेगु हे खः । भलसा काये छिगु कार्यकाल दुने झीगु म्हासिकास् नितिं न्ह्यानाच्वंगु नेवाः पहिचानया पलाःयात यक्व तिबः दइ । झीगु सन्ततिया नितिं नेवाः धका गर्व तायेका म्वायेगु दसि जुइ ।
सुभाय ।

सुरज रंजितकार (छिपा)
निगु पुखू